[Day 4] 28 OCT 2011 (陸奥湊 > 八食センター > 上野 )
10:15 - 10:34 陸奥湊 > 八戸原訂行程，坐JR由陸奥湊駅返去八戸駅，行一陣土產店再坐巴士去八食センター。
但去到本八戸時，小小恃住上年用goggle map搵過，
長苗代駅可以行去八食センター，大約十五分鐘卦，就建議响長苗代落車，行過去咯，
財政大臣即刻搵下個電話有無長苗代地圖，搵到後，JR剛剛到達長苗代駅，即刻跳落車。
落車之後，望望下班JR幾點，萬一行唔到去，番轉頭都知幾點有JR。
長苗代係無人車站，上車落車驗票要車長先生一個攪掂，
車長先生見到有兩個唔似當地人既傻仔跳落車，以為我哋蕩失路咁樣，
望咗兩望，確定兩個傻仔唔似落錯車先開車。
响長苗代駅望咗陣，財政大臣話見到有座灰色嘢，應該係果樹；
小小就見到有座黃色建築物，仲隱約記得八食センター係黃色，咁應該係黃色果樹唔係灰色果樹囉！！
兩條唔識死既茂李，一個認路唔記嘢，另一個記嘢唔認路，
人生路不熟，恃住有個GOOGLE MAP地圖，就亂跳落車，向八食センター進發。
經過天橋，行過馬路，眨吓眼就過咗十五分鐘，但仲未到喎
小小開始懷疑，係咪記錯呢？goggle map好大機會講係25分鐘而唔係15分鐘,
驚俾人閙既小小當然唔敢出聲,繼續行喇
好在行到咁上緊，見到馬路有個大大個廣告，講八食センター向前面唔知幾多百米再轉彎，
但個廣告好明顯係俾架車人士睇唔係行路人士睇囉．．．．是但喇，起碼無行錯方向先喇。
經過大塊蔥田，經過一條好長好長得車行無人行既大馬路，
經過一塊又一塊等賣既吉地,行咗25分鐘，終於到喇！！
望真啲，八食センター係黃色囉，一定唔係灰色；但唔係小小最初見到認為果座，而係另一座．．．．．
突然諗番起老年前，幾個傻仔响台灣飲完啤酒，
幾個負責認路既人竟然信個醉前醉後都係路癡既人認得路而行錯路事件．．．
健行咗半個鐘都只不過係11:00，咁早去喫午餐好似有啲過份(雖然成日都係咁
)，一於過隔離間大型書局 - 伊吉書院西店，行吓睇吓書喇。
伊吉書院好大，以為呢區無咩人，點知入面好多人睇書呀，雜誌呀咁。買咗兩本書 (1320円)
伊吉書院對面有間嘢SANWADO，大大隻漢字寫住〔生活館 食品 酒〕，
斷估應該有嘢食賣喇，即管去望吓喇。
入去一望，嘩！！果真係一間大超市。
好多生果，蔬菜，雞蛋，米，雜糧．．．兩條茂李又癲喇，即刻推架超市車掃貨。
掃貨期間，小小又感覺到有啲日本師奶响度竊竊私語，
唔使問梗係奇怪點會有遊客去呢樹本地人買嘢既超市喇，仲要自備購物袋。
唔好講笑，超市先係掃貨最佳地點呀！
遊客區既青森蘋果，個樣靚啲，包裝靚啲，咁就賣幾千円一箱，
但自己喫或者送俾屋企人，最緊要係經濟實惠嘛，呢樹一袋五個先298円，抵呀！！(零食2154円)
買完嘢食，當然要去八食センター開餐喇
[午餐]：八食センター
又係行幾轉，呢間買啲，果間又買啲。
今年想喫既嘢都SHOW哂出嚟，手指指攪掂，財政大臣今次無機會再畫果啲似蘿蔔既魷魚喇。
今次買咗：
帶子 x 4 = 1000円，大蝦 x 2 = 1200円，蠔 x 2 = 1000円
北寄貝 x 2 = 400円，刺身用蝦 x 8 = 500円，秋刀魚 x 1 = 200円啤酒响頭先間超市買 108 x 2 = 216円
七厘村加咗價，由200円加到300円，總共5116円
帶子依舊鮮甜，食完帶子肉，一定要飲埋啲汁，隔離對日本情侶，仲帶埋私家牛油嚟燒帶子添呀；
大蝦夠哂大隻，肉爽味甜；
蠔就普普通通喇，始終唔係小小鍾意既食物，見財政大臣鍾意先買
北寄貝又係鮮甜，夠哂厚肉；有蝦籽既刺身用蝦要成630円一隻，有啲貴唔捨得試，所以揀咗普通刺身蝦，
本來成兜賣1000円，小小想喫但又唔想喫咁多，財政大臣唔知用咩方法，買咗500円8隻番來，
味道普通喇，無想像中咁正咁甜，可以不試；
喫到七七八八，財政大臣又走出去睇吓仲有咩想燒，點知買咗條秋刀番來，
財政大臣本來想買條再大啲既，但諗起個爐唔係大，貪大食買條大既咪盞整鬼自己，
秋刀果然要放最後燒，因為實在太痴太大煙 (因為魚油太多喇)，但燒完真係好好味；
輪到小小出去走一轉，諗住買梳蕉嚟燒，點知梳梳都鬼咁多隻，仲唔平添，
一梳8隻起哂梅點要150円，生啲既要250円，香港6隻大約都係5-6蚊姐，
前世未喫蕉咩，咁鬼貴既地門蕉，算吧喇，返香港先燒蕉囉！
喫哂魚，無嘢想喫執嘢走，食具還番俾七厘村後，
財政大臣怪叫：唔記得响牛肉檔買和牛要嚟燒呀！！
頭先行兩轉又唔記得買，食具都還返俾人先記得，
無喇，下次囉，下次咪買埋和牛燒囉．．．下次响對面超市買埋青椒，茄子嚟燒添吖！！
食飽有氣有力，當然shopping最好！！(兩個手指公
)八食センター入面除咗海鮮賣，仲有其他嘢架，好多手信買架，青森果啲蘋果蛋糕呀，批呀都有連黑蒜豉油都有！！
有咩分別？同一款豉油，同一生產，梗係無分別，唯一分別咪就係價錢囉，平咗101円！！
尋日响A-factory買要499円，呢樹賣398円！！！！唔得，我要溝貨！！！！
溝貨之餘，要喫番個紅豆餅安撫吓受傷既心靈。
唔識日文字既小小，手指指買紅豆餅，紅豆餅姐姐指吓堆牛油既物體，小小為咗快啲有得喫，係唔係都點頭喇！
科水80円後，一啖咬落去．．．．．E～～～吉士？奶黃？
小小大近視得好緊要，果堆原來係吉士唔係牛油．．．．．．嗚．．．．偶要紅豆喲，不是奶黃吉士耶．．．T^T
點解唔學日文呀 ！！！
喫哂嘢，買哂嘢，係時候撤退。
放心，買咗咁多嘢，唔健行喇，要成25分鐘，仲要拎多咁嘢，NO WAY LA！
出門口乖乖哋等巴士。
[暫時是日消費]
伊吉書院：1320YEN
SANWADO 超市：2154YEN
八食センターBBQ：4300YEN
七厘村：600YEN
買錯奶黃吉士餅：80YEN
八食センター手信：1044YEN
巴士：200YEN
－－－－－－－－－－
總共：9698YEN
註：
- 八食センター可以由長苗代駅行過去，但唔鍾意行 / 唔行得，就坐巴士算吧喇
- 陸奥湊朝市既刺身平過八食センター
沒有留言 :
發佈留言