[Day 6] 05 AUG 2010 (八戸 > 秋田 - 秋田竿燈まつり)
[早餐]：コンフォートホテル八戸
最後一日喫呢度既早餐喇，喫埋今日，要連埋啲大行李大移動去秋田。
07:09 - 07:47 八戸 > 盛岡
07:58 - 09:31 盛岡 > 秋田
今日早起身，一上車當然係搏命訓，半夢半醒咁轉車，轉完車又即刻訓。
終於夠鐘落車，到秋田。
一出秋田駅，四圍望間酒店向邊，
根據小小預訂時，酒店提供既地圖，應該一出站就係，
但一出站，只見到一座個樣好高檔既酒店，仲好鬼近添。
財政大臣起勢咁問：係咪呢間架？無理由咁近架？無理由咁高檔架？你望真啲個名好喎．．．
小小自己都唔係好信：行近啲望真啲咪知囉
行近啲望到個日文名：無錯喇，真係呢間呀！
點解財政大臣咁疑惑呢？因為小小向來唔會訂啲咁高檔 (貴) 既酒店，只會訂啲個樣殘殘舊舊 (最緊要平) 果啲酒店，通常要行幾分鐘，唔會一出站就到。
搵到酒店，未夠鐘check-in，寄存咗件大行李就出去霸位先囉。
又係早早就到，條街直頭未有人圈地。
如果唔係見到啲有料指定席，都唔知原來到咗會場。人地未圈，就我地圈先喇！！
又係劈低哂啲架生，就向秋田市民俗藝能傳承館 (ねぶり流し館)出發。
無帶旅遊書，又唔記得拎地圖，兩條傻仔，兜咗個大圈先搵到，
其實路牌同手上唯一既公仔地圖都有指出ねぶり流し館既位置，就係因為唔知道 ねぶり流し館 = 秋田市民俗藝能傳承館，就行多咗好多冤枉路。
搵到秋田市民俗藝能傳承館之前，經過竿燈妙技會場，當然又睇吓人比賽。
幾經辛苦卒之到咗秋田市民俗藝能傳承館。(入場100円 x 2)
指定動作，同三枝唔同重量既杆燈影吓相，試玩下。
財政大臣試玩中若，結果當然唔可以單手托起喇！
小小呢啲無力水既無謂扮勁，陣間拎唔緊跌鬼爛人地枝杆燈仲死，扮嘢影相算囉！
向樹磨磨吓，竟然有班大學生入嚟表演，全場即刻擔好哂櫈仔坐向樹睇。
呢樹燈光充足，又唔係咁多人，有櫈坐仲有冷氣，真係睇得特別開心！
睇完表演，過埋隔離睇舊金子家住宅。一入去有三個婆婆一個伯伯向樹唱歌，
啲日本人一路聽一路笑一路拍手，奈何兩條港燦唔識聽日文，睇咗一陣就走佬。
十二點零鐘，又係喫飯既時間。諗住返去西武入面既七代佐藤養助開餐，
點知途經 あきた県産品プラザ 喎，當然要入去運吓吉喇，
裡面都幾多手信賣，但小小一心諗住買米，對其他嘢好似唔係好睇得上眼。
咁樣運一運吉，就運咗成個鐘，拿拿聲仆去西武。
[午餐]：七代佐藤養助開餐
去到西武地庫，離遠見到七代佐藤養助要排隊，但千里迢迢嚟到秋田，
無理由唔喫稲庭うどん，排就排喇。
好在唔係排咗好耐，大約廿分鐘就有位。
天婦羅烏冬(二段) (左 2200円) 鳥海烏冬 (右 1200円)
貪心小小驚死試唔真醬油同胡麻醬既味道，叫咗個二段烏冬，分別點醬油同胡麻醬。
味道果真唔錯！
喫飽，當然要响西武個超市行吓喇。
一心諗住買秋田米返歸，但左睇右睇，無咩幾款揀，最終無買到．．．．
本來諗住無著落，行番酒店途中，見到イトーヨーカドー喎，仲要就嚟結業，好多嘢都有特價，當然包括超市喇！！
即刻掃咗袋2kg既秋田美人米！！！
掃完當然返酒店check-in，順手放低包米，唔通托住包米去睇祭咩？
跟手又去秋田市民市場逛喇！
真係好鬼鍾意去外地行街市，睇吓啲菜價，魚價，
又望吓啲師奶買咩，估吓佢煮咩餸。
咁樣八吓八吓，又兩個鐘！
但仲未夠鐘睇秋田竿燈まつり喎！
咁去行千秋公園喇！
兩條戊利，又試得閒到可以坐向公園，一路撥扇一路吹水．．．．．
差唔多夠鐘，先慢慢fing番去會場，坐一陣，又開show喇！！
其實玩竿燈，難度高又危險。小小就係睇見表演者係咁駁高枝竿燈，
啪一聲，其中一個接駁器承受唔到度力斷咗，成枝竿燈跌落嚟。
過一陣，有個成腳都係血既表演者坐咗向小小前面等急救，
小小咩都唔識，只可以幫佢撥扇，等佢無咁熱。
撥咗好耐，終於有人抬佢走，聽到佢講句：大丈夫，個心都安樂啲。
[晚餐]：LOTTERIA
睇完竿燈，一路行番酒店附近一路睇有咩喫喇。
但今晚就無咁好彩，無咩啱心水，咁去LOTTERIA 喇，向酒店樓下。
起初諗住試佢個期間限定，十段burger架嘛，
但入到去又唔見有宣傳單張，好可能個期間限定完咗．．．
咁小小咪扮醒，用响香港print 定 coupon ，買咗兩個特價餐(450円 芝士包 + 薯條，470円 漢堡包 + 汽水)，再加啲蘋果批呀，雞塊呀同雞件囉 (全部加埋1300円)，咁肚餓，叫多啲飽啲嘛。
點知．．．．見到店員執好份餐，有啲後悔嚟呢樹開餐．．．
個包細到飛起，差啲以為買咗兒童餐，雞塊又細細舊，連隻雞下脾都係細細件，你睇你睇，小小隻手咁細，都可以一手罩住成個包。喫慣咗香港老麥呀，漢堡皇呀果啲size架嘛，呢度啲真係太細份喇。
呢餐輕食，邊夠兩個大食積填肚，但成21:30 ，唔想再四圍搵喇，
即刻响隔離mister donut 買個朱古力donut ，財政大臣就去lawson買個king size杯麵。
[住邊]：ホテルメトロポリタン秋田
距離JR駅只係1分鐘，非常之近；
除咗住溫泉酒店，未試過向日本住間酒店有咁大間房，仲有咁大個透明玻璃廁所(10900YEN)。
[是日消費]交通：0YEN
早餐：0YEN
入場：200YEN (民俗芸能伝承館)
午餐：3400YEN (佐藤養助)
晚餐：1300YEN (LOTTERIA)
宵夜：100YEN + 195YEN
住宿：10,900YEN
－－－－－－－－－－
總共：16,095YEN
註：
- イトーヨーカドー 應該就快結業
- 西武個超市啲米唔多選擇
沒有留言 :
發佈留言