[Day 5] 04 AUG 2010 (弘前 > 青森 - 青森ねぶた祭 > 八戸)
[早餐]：ビジネスホテル新宿
弘前呢間酒店包朝食，唔係咩貴價嘢，只係陽春麵同雞蛋沙律麵包。
[早餐]：ビジネスホテル新宿
弘前呢間酒店包朝食，唔係咩貴價嘢，只係陽春麵同雞蛋沙律麵包。
雖然今日都係正常三餐，但唔好意思喫咁多碗麵打底，廢事人哋以為香港無嘢食，連啲人仔細細既港燦，餐餐都喫咁多嘢。
再見喇弘前駅，除非再嚟睇 / 採 / 喫蘋果，否則都應該未必會再嚟。
(又否則又應該又未必，到底我向度講咩呢？)
09:09 - 09:40 弘前 > 青森
一出青森駅，即刻搵個locker喇，拎住尋日啲手信呀，行李呀，
未行齋睇都覺得手軟腳軟呀。
去到locker，一睇full哂，唔係呀話，家陣好早姐，咁快full哂？
好在，撐大啲對眼，見到有臨時locker，拿拿聲碌去搵臨時locker。
仲有七成未有人用，細locker 300円，大既400円。
寄完行李，又出發囉。
今日行程非常輕鬆，一啲都唔緊密！
第一樣行程就係霸位，第二行程係產物館，第三行程就係睇祭。
換言之，是日無行程，各位可以解散喇！
10:00 一離開JR車站，就開始落兩。
起初只係毛毛細雨，越行就越落越大，
出到去到大街，直頭大到落狗屎咁呀．．．死喇，咁大雨，今晚點算？
會唔會無得睇架？個個都話青森個祭最正，睇唔到會好失望架．．．．
唔理落毛毛雨定大狗屎，照霸位先喇！
劈低張地席，放低埋張櫈仔，今日咁落雨法，連腳架都放低埋，
即刻成身鬆哂。
[午餐]：亞希
個身一放鬆，個肚又覺餓，好，去搵食。
11:00 亞希一營業就衝入去做第一輪客。
點咗炸豬定食 1360円，同埋特製ふらい丼 780円。
唔識日文既財政大臣同小小今日點order嘢？
今日就簡單囉，向門口用相機影低想喫果樣嘢既demo (ふらい丼) 咪得囉
財政大臣個炸豬就麻煩啲，啲炸牛炸豬炸魚全部都一鬼樣，要講pork先得
ふらい丼 780円 (左) 炸豬pork 1360円(右)
ふらい丼：有炸魚，炸魷魚，炸青椒
新鮮熱辣，脆卜卜，小小最鍾意個飯底個甜甜哋既醬汁 (似似哋鰻魚汁既味但又唔係)，真係扒到最後一粒飯都要痴滿啲汁，正
財政大臣個炸豬仲得，個面夠脆，舊豬唔肥但好有肉汁，一個唔肥既肉點先可以整到唔韌兼有汁呢？
若果尖沙咀果間とん吉叫好好好食的話，咁亞希個炸豬叫超好食。
唔好講笑，劈哂成個丼，加埋碗麵豉湯，醃菜，麥茶，真係飽到上心口！
喫到咁飽，當然又係消脂時間。
今朝講過，是日無行程，陣間去到青森県観光物産館アスパム，各位團友盡情啲shop喇，買喇，short喇．．．．yeah！！
青森県観光物産館アスパム 地下同1/F 都係賣手信，好多本地遊客，外地遊客都向度買手信，款式又多，嘢食呀，飲品呀，衫呀，金魚呀．．．真係有排睇。
十幾樓仲有觀光層添 (有料)但今日天氣唔好，費事上去咩都睇唔到哂錢。
行到 1/F ，郵便所向樹擺檔，財政大臣買咗張postcard寄俾自己。
一張蘋果postcard 180円，郵費要220円。
嘩！！十幾廿蚊郵費！寄張紙仔都咁鬼貴！唔怪得郵便所都要擺檔囉，搵食果然艱難。唔擺檔搶遊客錢，仲邊有人寄信。
雖然呢，剛才呢，先話過碗丼喫完飽到上心口，
但係呢，小小呢，一講到有粟米味呀蘋果味既雪糕呀雪條呀蛋糕呀啫喱呀果啲嘢，真係咩抵抗能力都無呀！
好衰唔衰，行行吓見到有蘋果雪糕喎，即刻攤大手板問財政大臣攞 280円，買咗杯蘋果味雪糕喫！
第一二啖都覺得有蘋果香味，喫喫吓好似得番甜味，好在喫到底有幾粒蘋果肉，先醒起呢杯其實係蘋果味雪糕。
向青森県観光物産館アスパム後門出去，沿住海傍行，會見到條青森灣大橋同八甲田丸。今朝仲落大狗屎，家陣停哂雨仲出太陽。
兩條戊利咁得閒，當然要當呢樹係尖東海傍咁行吓，hea吓喇。
行行吓，hea hea吓，fing到去停車場果邊，竟然見到今晚準備出巡既燈籠車泊哂向樹，呢個時間又要燒吓菲林喇。
影完相，hea咗咁耐，都只不過係14:30，仲有大排把時間，就開始行商場。
去咁多次日本旅行，都未試過得閒到可以連續行咗五六間商場。
無計喇，兩條無文化無學識又唔識藝術同歷史，只係識食同訓既戊利，一知道三內丸山遺跡要坐唔知幾耐車又唔去，八甲田丸得條船唔知睇咩又唔去，美術館因自知無咩藝術天份又唔去，攪到鬼死咁閒。
結果，由街頭行到街尾，商場，超市，咩都行均，連人地住宅區既街市都行埋，都係街市同超市先啱我地睇
。15:30 四圍都行均，行返去旅遊書介紹既Agua Festival City 新鮮市場（Festival City アウガ 地下1階）行。
類似八戸既八食センター咁，有啲魚檔菜檔，乾貨雜貨咁。
其中有間雜間，啲貨 (零食) 同青森県観光物産館アスパム差唔多，但唔使計稅，好多手信要買的話，嚟呢處逛吓可能慳到唔少稅。
17:00 行到腳跛，又番去今朝霸位果樹，倒走地席上面既雨水，跟手去喫晚餐。
[晚餐]：カレーハウス CoCo 壱番屋
18:00 行咗咁多個圈，唔覺有咩特別嘢好食，卒之走去カレーハウス CoCo 壱番屋喫咖喱飯。
咖喱豬 (左) 680円，咖喱雞 (右) 680円
除左一個方啲一個圓啲之外，兩份肉無論味道同質感都差唔多，根本分唔出豬牛定雞
撇除舊肉，咖喱汁都ok唔錯既。
填完肚，又係時候去等睇祭。
老實講，小小對青森呢個青森ねぶた祭有好大期望，
之前聽人講話好好睇，好精彩，啲跳人好多好震撼。
但睇完之後，覺得普普通通，唔知係跳咗幾晚所以無哂力 (今日係青森ねぶた祭第二日)定係今朝落大雨以為唔使跳但最終停哂雨又要跳而無心機，啲跳人跳得好hea，仲hea過小小今日既行程。
可能期望過高，小小覺得無咩期望既盛岡さんさ踊り仲好睇過今晚呢個青森ねぶた祭。
大約20:45 完，可以慢慢行返去JR站，拎番行李，仲唔太趕都坐到21:42 - 22:44 青森 > 八戸 班JR。
[住邊]：コンフォートホテル八戸
又要返八戸住喇(5800YEN)。
[是日消費]交通：0YEN
早餐：0YEN
午餐：2140YEN (亞希)
小食：580YEN (燒帶子，蘋果雪糕) + 442YEN (飲料)
晚餐：1360YEN (カレーハウス CoCo 壱番屋)
住宿：5,800YEN
－－－－－－－－－－
總共：10,322YEN
註：
- 青森市觀光景點唔多，一日咩都睇哂
- 街市入面買手信同大型商場差唔多，但唔使計稅
沒有留言 :
發佈留言