[Day 2] 01 AUG 2010 (八戸 > 本八戸 - 八戸三社大祭 > 白銀 > 八戸)
[早餐]：コンフォートホテル八戸
酒店包早餐，當然要喫埋先出去玩。
呢間酒店個朝食都算唔錯，有飯糰，焗既麵包，蒸既麵包，
烚蛋或者炒蛋，湯，薯仔，腸仔，菜絲，即沖穀麥早餐，
橙汁，牛奶，咖啡，麥茶，仲有橙同西柚添。
以上朝食照片來自官網
[早午餐]：八食センター
喫完早餐，係時間起程，
坐頭班車08:55 - 09:04 由八戸駅去八食センター。
七厘村10:00先開門，襯住七厘村未開門，當然要把握時間四圍裝下，
陣間買咩嘢食，燒咩嘢食咁喇！順手買埋手信！！
啲海鮮拼盤鬼死咁吸引，樣樣都想喫
扇貝呀，蠔呀，魷魚呀，海膽呀．．．．好想食呀！！！
行行吓仲見到新鮮出爐既炸蝦，熱騰騰，香噴噴，真係好有衝動買盤拎住咬
但喫咗炸嘢陣間點喫燒海鮮？！唔得！我忍！！
望望錶，09:45，可以去買海鮮喇！衝呀！！
盤盤海鮮都有三條或以上既魷魚，但得兩條友仔，
喫咁多魷魚膽固醇超哂標之餘，個胃會裝唔落其他嘢．．．唯有散叫
小小同財政大臣都唔識日文，點散叫？咪就係畫公仔囉
第一樣係扇貝(600YEN4隻)，第二樣係魷魚(270YEN一條，硬覺得財政大臣畫得好似條蘿蔔，但老闆又睇得明喎)，第三樣係大大大蝦(1600YEN2隻，超大隻)，第四個真係連小小都唔明既．．．海膽
咁樣點，就唔使咁多條魷魚，又喫到其他嘢！！
生蠔味道普普通通喇，扇貝鮮甜，
超大蝦真係無得頂，夠哂大隻唔霉肉夠爽，魷魚新鮮，
最掂係隻大過小小個拳頭既海膽刺身，好鮮甜，美味，大大瓣放入口，
真係感動到震呀
燒嘢食唔少得既啤酒，正！！
喫喫吓，突然有人掉隻蕉落小小個爐上面，
原來係隔離枱既日本人買梳蕉多咗隻，請我地喫燒蕉！多謝哂！
八食センター有巴士去市中心，但貪心小小買咗手信要番酒店放低，
兼格行埋八戸駅隔離個八戸地域地場産業振興センターshopping，
於是坐番巴士番八戸駅，shopping，放低戰利品，再坐JR過本八戸，睇八戸三社大祭。
坐13:07 班JR 由八戸駅，去到本八戸駅大約十分鐘，
今日八戸三社大祭下午三點鐘開始，見仲有時間，
咪慢慢fing去會場囉．．．．
見到山車又停低影吓相，
見到有嘢食賣又裝下
最終14:00先去到會場，霸唔到第一行位，第二行都無埋，
咁咪霸第三行囉，點知，就係賴嘢既開始．．．．．．
八戸三社大祭準時三點開始，先嚟幾吓響炮，跟手有音樂，
跟住見到有馬，有人．．．．．．
跟住就只係見到啲路人向前面行嚟行去，得閒仲停低企哂向度，
小小咁矮仲要坐地下，除咗路人既屁股，咩都睇唔到，
間中都睇到山車個頂既．．．．
天氣又曬又熱又無嘢睇到，個頭又痛，卒之同財政大臣都忍唔住，
決定走喇！唔睇喇！哼！！！
四點鬆啲就走人，咁早？去邊？咁就梗係去開餐喇！！
一路fing番去本八戸駅，見到啲未出發既山車，睇人地準備出發，
點都好過睇路人既屁股！
[晚餐]：すたみな太郎
由本八戸，坐JR去白銀，大約20分鐘。
去到白銀駅，又嚟頭痛既開始．．．．
白銀駅係無人車站，小小又無帶地圖，得個地址，好在鍾鍾吓鍾到去間Lawson，
買枝寶礦力168円又順便問路，問路佢地又識答，手指指吓我地又明喎，掂哂！
行咗幾轉之下，卒之搵到すたみな太郎。
すたみな太郎係間燒肉店，1980円90分鐘放題任吃，要埋飲料放題就加200円，埋單即係每人2180円。
似足香港啲韓式燒肉店，有豬牛雞菜，壽司，甜品，淥麵，仲有生果，雪糕，雪葩，綿花機添！但質素就差好遠囉。
豬牛雞都ok好味，壽司新鮮大把款揀，甜品仲勁，成個西餅店甜品櫃向樹，
蛋糕，西餅，大福，班戟．．．．．正！
雪糕，雪葩任君選擇，啲o靚仔仲整埋綿花糖放上雪糕上面，
生果有荔枝，菠蘿，奇異果，仲有蜜瓜。
喫飽要趕車就麻煩少少，因為成個鐘先一班車返八戸駅，
趕唔到又要等成個鐘，拿拿臨急急腳又碌番車站坐JR返歸。
今日雖然睇祭睇得唔太開心，喫飯又有啲趕頭趕命，
但咁既價錢向日本喫到餐OK既燒肉放題，所有心情都番哂嚟
有嘢食就咁容易開心，財政大臣，小小好易養架咋，當豬咁質飽就得架喇
[住邊]：コンフォートホテル八戸
繼續向八戸駅住 (6000YEN)。
[是日消費]交通：200YEN + 200YEN(巴士)
早餐：3,870YEN (海鮮) + 256YEN(啤酒) + 400YEN(七厘村)
補給：168YEN (寶礦力)
晚餐：4360YEN
住宿：6,000YEN
－－－－－－－－－－
總共：15,454YEN
註：
- 八食センター，愛好海膽者必食即開海膽
- 生蠔唔係必食ITEM
- 睇祭唔理大定細，一定要晨早霸位，仲要一定霸第一行
- 有時間既話，すたみな太郎燒肉放題喫得過
沒有留言 :
發佈留言