[Day 7] 24 JAN 2008 (乳頭溫泉 > 仙台)
[早餐]：妙乃湯 - 朝食(0YEN X 2)
一早起身又係浸完溫泉去先去喫早餐。一路食早餐一路望住出面落大雪。
食飽執埋野，又係時候離開。
撞啱今日見到秋田放送嚟拍攝，老公大人話見到女MODEL好靚女，小小則掛住四圍拱見唔到。
今日打算落去田沢湖，坐埋一週巴士，再落角館。
坐巴士 (350YEN X 2)去田沢湖畔落車，一落車就食哂雪，又大風又大雪，入去田沢湖畔既手信店，著返好哂啲戰衣，再出去摶殺過。由田沢湖畔手信店，基本上過條馬路就見到飲水思源像，但大風大雪，寸步難行，隻眼都打唔開，硬衝過去影左幅相，本想行出啲同個田沢湖合照，但太大風，吹到小小企都企唔穩，能見度又低，又係夾硬影左幅相，就嘗試行去搵蓬萊之松。
蓬萊之松未見到，見到辰子觀音影幅相後，小小同老公大人商量後，實在頂唔順兜口兜面咁食雪，同埋咁行法會有危險，決定放棄田沢湖之行，撤退返手信店，等一個鐘後既巴士。
向手信店入面無無聊聊，買左包比內地雞薯片，一路食一路睇電視。
睇見新聞話秋田有暴風雪，此刻都未知危險，只係諗陣間角館之行唔好咁大雪就好喇～～
去到田沢湖駅，見到一堆人積左向樹，即刻心感不妙。
小小捐到最前，發現列車運休。咩話？！運休？邊度都唔使去？？
運休唔知幾耐，眼見去到下午四點都無車，正擔心要向車站過夜之際，見到有人拎住東京車飛由改札窗口行過嚟，唔理三七廿一，即刻排隊劃飛返仙台。
車掌先生劃左張11:02由盛岡去仙台既車飛俾小小，但家陣十二點幾喎，係咪劃錯左呀？原來最後一班依然運行既車誤點，預計遲110分鐘，多得呢班誤點既車，我地先可以返到去仙台。
手拎車飛，唔識聽日文宣佈，所以唔敢四圍走，唯有企向閘口前面，見人入閘跟住入喇。等左一輪，聽到一輪嘰嘰喳喳既日文，當然跟人尾出月台等車。
出到去發現積雪非常嚴重，連條路軌都見唔到，唔怪得要誤點咁耐同運休喇。
等左陣見到架車慢慢駛入月台，車頭有把刀咁既物體，好似破冰咁輾開啲雪。
排隊上車，人多到向兩卡車中間都無咩位剩；企左半個鐘到左盛岡先有位坐；
坐多一個鐘先落到仙台，落到仙台即刻有鬆一口氣既感覺。
[午餐]：伊達の牛たん - 牛舌 (2415YEN)
落到仙台，第一件事當然去醫肚！
第一日到仙台時喫左利久，今日喫伊達喇。
極厚牛たん芯たん定食：厚燒牛舌，彈牙，鬆軟，正 (1575YEN)
通定食：配埋蔥嚟食，味道都唔錯喎 (840YEN)
今日原定行程全部告吹，唯有向仙台遊遊蕩蕩，FING FING下咁行下 UNIQLO，行青葉通，買100YEN手信，買100YEN飲品，刨書店，打書釘。
行到腳仔軟，入去老麥喫左件SHAKA SHAKA CHICKEN，配芝士粉，好似SHAKE SHAKE薯條咁倒啲芝士粉落去搖幾下，啲芝士粉又幾香喎。
[晚餐]：MOS BURGER (1630YEN)
諗唔到食咩，見今均未喫過MOS BURGER，就食佢喇。
[住邊]： ホテル松苑
又住番呢間酒店，但今晚大風雪，吹到啲窗格格聲響，仲有凍風吹入嚟，今晚覺得暖氣唔夠 (4600YEN)。
[是日消費]開餐：4,720YEN
交通：2,000YEN
手信：4,707YEN
住宿：4,600YEN
－－－－－－－－－－
總共：16,027YEN
註：大風雪下遊唔到田沢湖同埋角館，好失望
沒有留言 :
發佈留言