[Day 3] 20 JAN 2008 (山形 > 山寺 > 藏王)
[早餐]：ホテルさくらんぼ - 無料朝食(0YEN X 2)
訂呢間酒店之前，姑寒小小見到人地話包朝食，幅相裡面有麵包同咖喱飯。
咩話？無料朝食有咖喱飯？姑寒小小唔多信，厚面皮咁SEND個E-貓去問：你地個朝食幾點開始？有咩食？
佢一個鐘頭內已經回覆話07:00開始，有咖喱飯，麵包同生果。
咁仲使問，即BOOK喇！
結果證明，無料朝食真係有咖喱飯，又香又唔太辣，I LOVE IT！！
食左個滿足既朝食，即刻充滿力量，出發。
由山形去山寺，坐JR只需16分鐘，非常之近。
咪睇山寺個站細細咁，有LOCKER架，大中細都有齊。
由山寺駅行去山寺，大約5分鐘左右，放低300YEN (300YEN X 2)就可以開始登山。
咪住，收入場料金個伯伯指住姑寒小小，再指我對毛毛鞋，做出一個交叉手勢。
吓？唔俾我登山？
唔係，佢話我呢對鞋有登山有危險，叫我換左佢。
無情情邊有鞋換姐？！唔怕，俾入場料金隔離有個鞋櫃，入面有好多水鞋無料貸出，大約由5號半至9號左右。
雖然隻鞋太大唔多啱小小著，但為左安全著想，擔擔下鞋好過碌左落山。
唔覺唔覺就行左千級樓梯，冰天雪地下仲行到出哂汗。
上山容易落山難，一來上樓梯較安全，二來未有人行過仲係雪梯；落山就閉閉地喇，頭先既雪梯開始經多人踩過後變冰梯，濕滑非常。
有個早過我地少少落山既日本仔，向小小前面冼低左，小小已心知不妙，不嬲行平地都可以仆親既小小安全至上，除哂手襪雙手扶實凍冰冰又有雪既欄杆，好似BB學行咁，一級級咁落樓梯。
真係說時遲那時快，老公大人即刻冼親，小小肉都赤埋，即刻慰問老公大人有無跌親喇；轉個頭老公大人又冼多次，簡直SIR滑梯咁，坐低左連冼五六級樓梯，兩個日本人睇住老公大人冼落去，佢地望到呆左無哂反應．．．
老公大人咁好身手都冼成咁，著水鞋論盡盡既小小又驚又要行，結果向同一個地方冼親．．．
落果千級樓梯，老公大人冼低左幾次，仲界爛左條褲添。
坐返JR番山形，向山形駅度見到有幾個麻甩佬，著住啲草向樹唱歌跳舞。有啲JR職員仲用個殼仔裝啲紙碎，叫人倒落佢地身上。小小同老公大人同佢地都玩左陣。
( 去片 )
睇完就要買車飛上蔵王喇。
向小小買車飛既時候，老公大人走左去隔離既LOTTLERIA，買左個好美味又特價中既蝦蟹漢堡餐 (620YEN)，個包好味過MOS BURGER個蝦堡好多，薯條又熱辣辣，正。
想食MOS BURGER既蝦堡的話，不如試下LOTTERIA個蝦蟹堡喇。
大約35分鐘車程，就去到蔵王，山交巴士站溫度計顯示大約零下5度。
咁凍？！著返好哂啲戰衣，先由巴士站行去酒店。行左一陣，太陽曬住又唔係覺得好凍。因為太早既關係，去蔵王四季未夠鐘唔俾CHECK-IN，呢個時候當然放低啲行李先喇，然後再出去行個轉買下手信填下肚先。
[午餐]：藏王 - SOBA拱拱下又去番山交巴士站附近搵食。途中見到山形名物 - 玉こん (100YEN)，小小咁為食當然唔放過任何食野既機會，即刻LUR財政大臣喇！
味道呢，除左面頭既醬油同芥茉味，裡面係咩味都無，但係就非常有咬口。
返到去山交巴士站對面，見門口有〔そばや〕，即刻入去試試喇。入去食事處坐低，見到隔離枱喫緊個〔板そば特大盛〕 (1000YEN)，照辦煮碗整番個先。麵條彈牙，有陣清香既味道，但天寒地凍仲喫凍冰冰既面．．．間中食食下打冷震咁囉！
食完行個圈，拿拿聲返酒店CHECK-IN，試佢個出名既「離れ湯 百八歩」。
露天風呂都幾開揚，企高的話，真係有機會俾人一窺全相架！浸左一陣，又拿拿聲執好戰衣，勇闖地蔵山頂駅，睇今次東北之旅既重點 - 蔵王樹冰，出發！！由〔蔵王四季のホテル〕去〔蔵王山麓駅〕近到痺，幾分鐘腳程就去到。
買張來回吊車飛 (2500YEN X 2)咁鬼貴，姑寒小小一早計劃定15:00前上到去，然後坐到點燈先返落嚟，咁就唔使分兩次上去睇日景同夜景。
由860米高，坐大吊車上去1331米高既樹冰高原駅，再轉細吊車上去1661米高既地蔵山頂駅；溫度由零下4度，變成零下11度。山下雖然未算陽光普照，但尚有太陽，上到嚟只見風雪由左至右打橫吹。
由地蔵山頂駅行出去同地蔵，開運之鐘影相，一陣間成身已經好似發霉咁，俾雪冰封左。入番室內抖抖，再行出少少同樹冰合照。
DONALD同身後既樹冰約兩米距離，但大風雪下能見度越來越低，影相效果強差人意。本來想呻話自己唔好彩，天氣突變得咁利害，原來已算好運；因為唔夠一陣，天氣太惡劣太大風雪，工作人員拉繩封山，唔准人行出去，遲來既人連地蔵同開運之鐘都見唔到。咁唯有退守室內，等佢點燈之後再作打算。
入去餐廳，食住自備既百力枝，等到16:50左右，就慢慢見到青BB既樹冰。
呢個時候見到樹冰下有一個個人影，我地即刻執好裝備，再衝出去同樹冰死過。
同凍冰冰既樹冰玩完遊戲，又係時間返歸，再去同期待已久既山形牛放題〔玩遊戲〕。
[晚餐]：蔵王四季のホテル
山形牛壽喜燒，即係醬油打邊爐。
二人喫左兩大碟牛，一大碟雜菜，雜菜入面有黃牙白，金菇，烏冬，原來醬油煮烏冬又幾好味喎，食埋其他配菜，飽哂～～
呢餐真係大滿足。
食飽抖陣又嚟ONSEN時間，又去「離れ湯 百八歩」浸多轉先訓覺。
[住邊]：蔵王四季のホテル
LOBBY有免費上網，房間夠大又有靚景，包朝食，夕食有多款選擇，仲有個好正既ONSEN「離れ湯 百八歩」，27600YEN二人都算物有所值。
[是日消費]開餐：1,720YEN
LOCKER：300YEN入場：600YEN
交通：1,720YEN
吊車：5,000YEN
手信：6,910YEN
住宿：27,600YEN
－－－－－－－－－－
總共：44,750YEN
註：蔵王山頂真係好大風好凍，做足準備先好上去
沒有留言 :
發佈留言