[Day 2] 19 JAN 2008 (仙台 > 最上川 > 上山溫泉 > 米沢 > 山形)[早餐]：仙台駅 - Good Times Cafe(480YEN X 2)
一早起身凍冰冰，想搵個熱早餐喫。
經過松屋望兩下，啲早餐都唔啱胃口，再去仙台駅睇睇，向閘入面有間Good Times Cafe，門口放左個厚多士雙蛋煙肉set 好似好吸引，就試下喇。
味道唔錯，食飽又夠鐘上車。
今日要坐JR去新庄，再轉去古口，去最上川坐船仔。
計劃行程時搵車程，零零丁丁見到1/19有班車個名古古怪怪〔湯けむりこがね〕，但見唔使轉兩程車就去到新庄就book呢班車，點知呢架車原來好野嚟架。
呢架車三輛組成，兩輛指定席一輛自由席。
途經多個溫泉，車頭同車尾有展望室，車箱有電視接駁車尾個view cam，車間全部座位可以360度轉，將四張櫈轉好，中間再放張枱就可以打麻雀。
老公大人諗住咁早起身，向呢程車度眠一眠，但車外既風景實在太靚，成程向車箱度走來又走去，最閉係見到〔湯けむりこがね〕車上既單張，途經鳴子溫泉附近會見到一個超靚既橋景，更加要打醒十二分精神，金睛火眼咁望實車外。
車掌先生行過幾次都見到兩個興奮既傻仔走來走去，就同我地傾偈，拎左兩張〔湯けむりこがね〕限定既單張，蓋左個〔湯けむりこがね〕印仔送俾我地，仲俾意見書叫我地寫。
今 均出路遇貴人，半路中途有對日本情侶上左車，佢見到我成日裝裝下，估到我地等緊個靚橋景，佢就話我地知要踎低低抄上去，仲要快手快腳，因為個景 〔short-time〕，點知真係超級〔short-time〕，向過隧道期間，條橋出現向右邊，二秒就過左，小小手拎既傻瓜機SONY，快門實在太 慢，咩都影唔到，殘念．．．話咁快兩個幾鐘車程就咁過左。
一落車就跑去另一月台轉車去古口，點知又見到呢對情侶喎！
原來佢地都係去最上川坐船仔，仲問我地有無預約，想幫我地打電話預約，姑寒小小一早預約好，因為網上預約有得平100YEN嘛。
日本情侶見我地諗住由古口駅行過去船番所，就請埋我地一齊由古口駅坐的士，呢程3分鐘既的士，咁就670YEN，呢對客氣既情侶當然無收我地錢。
去到最上川，當然要買飛先上得船 (1870YEN X 2)，賣飛既歐巴桑問小小個名點讀，既然問到，厚面皮小小當然教歐巴桑點讀我個大名喇。
未夠鐘上船，當然唔放過任何機會四圍走四圍摸，突然聽到一輪日文跟住叫小小個中文名，唔通俾人發現我做衰野？！非也，原來叫我上船。
上船之際，開始落雪，仲越落越大，坐向船仔入面，可以睇到風景，但影唔到靚相，船伕先生一輪咀講日文，每隔一輪仲唱歌添，歌詞講咩就唔識聽，只係聽到船伕先生唱歌識震音架～～～
話都無咁快，45分鐘既船就坐完，掃一輪手信又坐巴士返高屋駅，再轉JR返新庄。
[午餐]：米沢牛駅当，新庄蘋果仔
坐到上JR，一盒熟口熟面既米沢牛駅当，好誘人咁坐向車仔小姐架車仔上面，今均到財政大臣失手，即刻科水買起佢！
蘋果仔：好睇唔好食，啲皮苦苦澀澀，唔食皮又無野食，照哽
米沢牛駅当：上次食過，今次再食依然好味
話咁快又到上山溫泉駅，落車既時候先記得，無帶毛巾？？？！！！！
天呀～～～咁點浸免費既足湯？？
無可奈何之下，去便利店買條190YEN既毛巾仔喇，就係咁，俾財政大臣哦～哦～哦咁哦左一輪．．．不嬲精打細算〔姑寒至真〕既小小就咁失手。
免費足湯既質數如何？非常正。我地去左四個免費既足湯。
最近JR駅既 - 前川橋の足湯，湯町の足湯，新湯の足湯 同 上山城の足湯。
最正果個係上山城の足湯，向上山城隔離，足湯夠哂熱，風景又靚，非常疏肝。
一邊慰勞雙腿，一邊又勞役佢，行均四個足湯，仲行埋武家屋敷。
慰勞〔勞役〕完對腳，係時候招呼下個胃喇，全速向米沢進發。
[晚餐]：米沢牛 - 黃木 (12810YEN)
由上山溫泉〔かみのやま温泉駅〕去米沢，坐JR只需半個鐘。
用半個鐘既時間，我地決定左去最近米沢駅又比較出名既〔黃木〕食米沢牛！
雖然叫最近，但都要行十零分鐘先到。
去到門口，又要諗食燒肉？和食？洋食？就燒肉喇！！
〔米沢牛燒肉定食〕4515YEN：每人叫左個燒肉SET，SET入面有三款肉，分別叫〔カルビ〕，〔赤身モモ〕同〔イチボ〕，牛肉刺身，仲有前菜，湯，飯，SALAD同甜品
〔カルビ〕油脂最多，入口即溶，但喫得多較漏，〔赤身モモ〕就最有牛味同咬口，但相對較韌，而〔イチボ〕就係兩者中間
試完味就再ENCORE左客〔上カルビ〕同〔イチボ〕。
〔上カルビ〕1890YEN：〔上カルビ〕係高一級既〔カルビ〕，油脂更利害。
〔イチボ〕1890YEN：明顯比set入面既肉靚同高檔，有咬口又有牛味。
食飽就係時候返歸，坐JR返山形住一晚，聽日一早去山寺再上蔵王。
[住邊]： ホテルさくらんぼ
由山形駅行酒店約五分鐘，外表舊舊地，有粒車梨子，十足十情侶酒店咁，但內籠OK喎，大堂有免費上網，包朝食〔有咖喱飯，麵包，生果，仲幾好味添〕，CHECK-IN時仲送左兩個免費杯麵同兩罐綠茶添，咁既價錢又係值呀 (5480YEN)。
[是日消費]開餐：15,759YEN
交通：3,740YEN
住宿：5,480YEN手信：2,680YEN
－－－－－－－－－－
總共：27,659YEN
註：大風雪不宜遊最上峽，只能睇不能影，有啲嘥
沒有留言 :
發佈留言